बागलुङ । दसैँ नजिकिँदै गर्दा बागलुङको मुख्य प्रवेश नाकामा रहेको मालढुंगा पुल १२ दिनदेखि सञ्चालनमा आउन नसक्दा जिल्लाको व्यापार–व्यवसायमा प्रत्यक्ष असर पर्ने देखिएको छ।
बागलुङलाई राष्ट्रिय सडक सञ्जालसँग जोड्ने मुख्य ‘लाइफलाइन’का रूपमा रहेको मालढुंगा क्षेत्रमा असोज ११ गते आएको बाढीले पुलको पर्वततर्फको पहुँचमार्गमा क्षति पु–याएपछि यातायात सेवा प्रभावित हुँदै आएको हो।पुल पुनः सञ्चालनका लागि मर्मत कार्य तीव्र पारिए पनि अझै पूर्णरूपमा सञ्चालनमा आउन सकेको छैन।
सडक अवरुद्ध हुँदा बागलुङमा आपूर्ति हुने दैनिक उपभोग्य वस्तुदेखि व्यावसायिक सामग्रीसम्मको ढुवानी प्रभावित भएको छ। वैकल्पिक र लामो बाटो प्रयोग गर्नुपर्दा ढुवानी खर्च बढेपछि त्यसको प्रत्यक्ष असर बजार मूल्यमा पर्न थालेको व्यवसायीहरू बताउँछन्।
निजी क्षेत्रका अग्रणी व्यवसायी चन्द्रप्रसाद ढकालले बागलुङको आयात–निर्यातका लागि मालढुंगा पुल महत्वपूर्ण सेतु भएको बताउनुभयो। पुल सञ्चालनमा नआउँदा जिल्लाको आर्थिक गतिविधिमा नकारात्मक असर पर्ने उहाँको भनाइ छ।
भारत र चीनलाई जोड्ने कालीगण्डकी करिडोर तथा पहाडी क्षेत्र हुँदै गएको मध्यपहाडी लोकमार्गसँग जोडिने महत्वपूर्ण बिन्दु भएकाले मालढुंगा पुललाई राष्ट्रिय प्राथमिकताका साथ मर्मत गरी तत्काल सञ्चालनमा ल्याउनुपर्ने उहाँले बताउनुभयो।
सडक सञ्जाल अवरुद्ध हुँदा पर्यटन क्षेत्रमा समेत असर परेको छ। बागलुङसँगै मुस्ताङसमेत सडक सञ्जालबाट प्रभावित भएपछि कोरला नाकाबाट हुने सामानको ढुवानीमा समेत समस्या आएको व्यवसायीहरूको भनाइ छ।
हाल दर्शन ट्रान्सपोर्टले वैकल्पिक मार्गका रूपमा पर्वतको फलेवास हुँदै बलेवा भएर बागलुङमा सामान ढुवानी गरिरहेको छ। साना व्यवसायीहरूले भने मालढुंगा–बेनी हुँदै सामान ल्याउने गरेका छन्। लामो र घुमाउरो बाटो प्रयोग गर्नुपर्दा समय र ढुवानी खर्च दुवै बढेको उनीहरू बताउँछन्।
ग्यासको ढुवानीमा समेत अतिरिक्त खर्च थपिएको छ। ग्यास विक्रेता संघ बागलुङका अध्यक्ष राजु गौतमका अनुसार वैकल्पिक बाटोबाट ग्यास ल्याउँदा प्रतिसिलिन्डर १५० देखि १७० रुपैयाँसम्म अतिरिक्त ढुवानी खर्च लागिरहेको छ।
“साना गाडीमा ग्यास ल्याउने काम भइरहेको छ। तर ढुवानी शुल्क धेरै लाग्ने र बाटोका कारण गाडी बिग्रने अवस्था पनि छ। पुल छिटो सञ्चालनमा आउनुपर्छ,” गौतमले भन्नुभयो।
मालढुंगा पुल सञ्चालनमा नआउँदा बागलुङमा भित्रिने ग्यास, इन्धन, औषधि, खाद्यान्न, फलफूल, तरकारी, कपडा, अण्डा, खसी, कुखुरा, स्टेशनरी तथा कस्मेटिकलगायत दैनिक उपभोग्य र व्यावसायिक सामग्रीको आपूर्ति प्रभावित भएको छ।
दसैँको समयमा बजारमा सामानको माग बढ्ने भएकाले पुल समयमै सञ्चालनमा नआए आपूर्ति व्यवस्थामा थप समस्या आउन सक्ने व्यवसायीहरूको चिन्ता छ। दसैँका लागि आवश्यक खाद्यान्न, कपडा, मासुजन्य वस्तु, फलफूललगायत सामग्रीको ढुवानी महँगो हुँदा त्यसको भार अन्ततः उपभोक्तामाथि पर्ने उनीहरूको भनाइ छ।
होटल व्यवसायी अर्जुन चोखालले दसैँअघि मालढुंगा पुल सञ्चालनमा नआए बागलुङका धार्मिक तथा पर्यटकीय क्षेत्रमा आउने आन्तरिक पर्यटकको आवागमनसमेत प्रभावित हुने बताउनुभयो। “चाडपर्वको मुखमा सडक बन्द भएपछि होटल व्यवसाय चौपट भएको छ,” चोखालले भन्नुभयो।
दसैँमा बागलुङ कालिका भगवती मन्दिरलगायत धार्मिक स्थलमा दर्शन गर्न आउने भक्तजन तथा पर्यटकको संख्या घटेमा होटल, रेष्टुरेन्ट, पूजा तथा फूलप्रसाद, दूधजन्य पदार्थ, फलफूल, तरकारी र खाद्यान्न आपूर्ति गर्ने किसान तथा व्यवसायीसमेत प्रभावित हुने देखिएको छ।
व्यवसायीहरूले दसैँअघि नै मालढुंगा पुल सञ्चालनमा ल्याउन सम्बन्धित निकायलाई आग्रह गरेका छन्। पुल सञ्चालनमा आए बागलुङको यातायात तथा आपूर्ति व्यवस्था सहज हुनुका साथै दसैँको व्यापार–व्यवसायलाई समेत राहत पुग्ने उनीहरूको अपेक्षा छ।
