बागलुङ । बागलुङ बजारमा बढ्दो सवारी जाम व्यवस्थापन तथा आवागमन सहज बनाउन बागलुङ नगरपालिका–२ का वडा सदस्य विदेश श्रेष्ठ आफैँ सडकमा खटिएका छन्।
बजारको धौलागिरि चोकदेखि बाघको सालिकसम्मको सडकखण्डमा सवारीसाधनको चाप बढेपछि यात्रु तथा सवारी चालकलाई आवागमनमा समस्या भएको अवस्थामा वडा सदस्य श्रेष्ठ सडकमा पुगेर जाम व्यवस्थापनमा सक्रिय भएका हुन्।
उनले सडकमा अव्यवस्थित रूपमा रोकिएका तथा आवागमनमा बाधा पुग्ने गरी रहेका सवारीसाधनलाई व्यवस्थित गर्न सहजीकरण गर्दै सवारी आवागमन सहज बनाउन सहयोग गरेका छन्।
सडकमा आफैँ उपस्थित भएर सवारी व्यवस्थापनमा सहजीकरण गरेपछि जाम केही हदसम्म व्यवस्थित भएको स्थानीयले बताएका छन्।
व्यस्त बजार क्षेत्रमा सवारीसाधनको चाप बढ्दै जाँदा विशेषगरी मुख्य सडकखण्डमा जामको समस्या देखिने गरेको छ।
सडकको सीमित चौडाइ, सवारीसाधनको बढ्दो चाप तथा अव्यवस्थित पार्किङका कारण बजार क्षेत्रमा आवागमन प्रभावित हुने गरेको स्थानीयको भनाइ छ।
वडा सदस्य श्रेष्ठले स्थानीयको दैनिक आवागमनलाई सहज बनाउन आफूले सक्दो सहयोग गर्ने बताएका छन्।
जनप्रतिनिधि कार्यालयमा मात्र सीमित नभई जनताका समस्या देखिएको ठाउँमै पुगेर समाधानका लागि सहजीकरण गर्नुपर्ने उनको धारणा छ।
बागलुङ बजारको मुख्य सडकमा हुने सवारी जाम दीर्घकालीन रूपमा समाधान गर्न व्यवस्थित पार्किङ, ट्राफिक व्यवस्थापन तथा सडक प्रयोगसम्बन्धी नियमको प्रभावकारी कार्यान्वयन आवश्यक देखिएको छ।
सवारी जाम व्यवस्थापनका लागि वडा सदस्य श्रेष्ठ सडकमा आफैँ खटिएको दृश्यले जनप्रतिनिधिको सक्रियता र स्थानीय समस्याप्रतिको चासो देखाएको स्थानीयको प्रतिक्रिया छ।
