काठमाडौं। ताराखोला गाउँपालिकाका अध्यक्ष प्रकाश घर्ति सुप्रबल जनसेवा श्री (तृतीय श्रेणी) पदकद्वारा विभूषित हुनु भएको छ । राष्ट्रपति भवन शीतलनिवासमा आयोजित विशेष समारोहका बीच नयाँ बर्षका दिन आइतबार राष्ट्रपति विद्यादेवी भण्डारीले उक्त पदकद्वारा घर्तीलाई विभूषित गर्नु भएको हो।
मन्त्रिपरिषद्को सिफारिसमा संविधान दिवस, २०७५ को अवसरमा घोषणा भएको समाजका विभिन्न क्षेत्रमा उल्लेखनीय योगदान पुर्याउने व्यक्तित्वहरुलाई राष्ट्रपतिले मानपदवी तथा पदकद्वारा विभूषित गर्नु भएको हो। घर्तिले लामो समयदेखी जिल्लाको दुर्गम ठाउँमा रहेर राजनीति र समाज सेवाका क्षेत्रमा पुर्याउदै आएकाे योगदानको कदर गर्दै पदकद्वारा गरिएको हो।
ताराखाेला गाउँपालिकाका अध्यक्ष प्रकाश घर्तिकाे जन्म वि.सं. २०३७ सालमा ताराखाेला गाउँपालिका वडा नं २ ,अर्गल ,ललगा गाउँमा भएकाे हाे । वि.सं. २०५२ सालमा अखिल क्रान्तिकारी विघार्थी संगठनमा आवद्ध हुनु भएका धर्ती वि.सं. २०५५ सालमा अखिल क्रान्तिकारीकाे जिल्ला उपाध्यक्ष हुनु भएको थियो।
जनमुक्ति सेनामा लाग्नु भएका घर्ति जनमुक्ति सेनाकाे बटालियन कमाण्डर र तत्कालीन नेकपा माओवादीकाे क्षेत्रीय व्युराे सदस्य पनि हुनु भएको थियो। पार्टी शान्ति प्रत्रियामा आएपछि पार्टीको केन्द्रीय सदस्य हुनु भएका घर्ति हाल ताराखाेला गाउँपालिका अध्यक्षकाे जिम्मेवारी सम्हालि रहनु भएको छ भने नेकपाकाे गण्डकी प्रदेश सदस्य पनि हुनुहुन्छ।
