जल तथा मौसम विज्ञान विभागले केही दिनयता बङ्गालको खाडीबाट निरन्तर रूपमा जलवाष्पयुक्त हावा आइरहेकाले मनसुन दसैँसम्मै रहन सक्ने जनाएकाे छ ।
पूर्वी भागमा दक्षिणपूर्वी जलवाष्पयुक्त हावाको प्रभाव देखिएकाले मनसुनी गतिविधि अझै बढ्ने अनुमान छ । विभागका अनुसार मनसुन सकिन जुन किसिमको वातावरण आवश्यक पर्थ्याे, अहिले त्यो देखिएकाे छैन ।
तल्लो वायुमण्डलमा पश्चिमी वायु चल्नुपर्नेमा अहिले पूर्वी वायु नै सक्रिय रहेकाले मनसुनको समयावधि लम्बिएको मौसमविद् समीर श्रेष्ठले बताए ।
पश्चिमी वायु सक्रिय भएलगत्तै नेपालमा चिसो बढ्ने अनुमान गरिएको छ । सामान्यतया नेपालमा जुन १० मा मनसुन भित्रिएर सेप्टेम्बर २३ मा अन्त्य हुने गर्थ्याे तर यस वर्ष १० दिन ढिलो गरी ९ जुन (असार ५) मा मनसुन भित्रिएको थियो । गत वर्ष पनि अक्टोबर ५ मा मनसुन बाहिरिएको उनले बताए ।
मौसम पूर्वानुमान महाशाखाका अनुसार नेपालमा लामो समयको मौसमी गतिविधि प्रक्षेपण गर्ने प्रविधि नभए पनि एक सातासम्मको गतिविधि प्रक्षेपण गर्न सकिने प्रविधि छ । यसअनुसार दसैँको सुरुआती दिनमा देशका धेरैजसो स्थानमा वर्षा हुने सम्भावना देखिन्छ ।
हाल देशभरि सामान्य बदली रही केही स्थानमा मेघगर्जन र चट्याङसहित हल्कादेखि मध्यम खालको वर्षा भइरहेको महाशाखाले जनाएको छ । यो स्थिति शनिबारसम्म रहने बताइएको छ ।
