बागलुङको ढोरपाटन नगरपालिका वडा नं.२ अर्नाकका एक युवाले दुध बिक्री गरेर मासिक रुपमा ६० हजार बढिको आम्दानी गर्ने गरेका छन् । स्थानीय ३१ बर्षिय निमलाल पाण्डेले आफ्नै घरमा पालेका उन्नत जातका गाई र भैँसीबाट दिनमै ३० लिटरसम्म दूध बिक्री गर्ने गरेका हुन् ।
उनी करिब ५ बर्षसम्म रोजगारीका सिलसिलामा खाडि मुलुक बसेर फर्किएका युवा हुन् । विदेशमा रहँदा त्यहाँको दुखसँगै गाउँको सम्भावना समेत महसुस गरेका उनले अहिले आफ्नै घरमा चारवटा गाईभैंसी पालेका छन् । पाण्डेले होल्यान्ड जातका दुई गाई, मुर्रा क्रसिङ जातको १ भैँसी र लोकल जातको १ भैसी पालेर दूध बिक्री गरि आम्दानी गर्ने गरेका हुन् ।
आफूले विहानै दूध दुहेर बिक्रीका लागि दैनिक बुर्तिबाङ बजार झर्ने गरेको उनले बताए । ‘बिदेशमा अरुको काम गर्दा सोचेको पैसा कमाउन पनि नसकिने रहेछ,’ उनले भने, ‘अर्काको गुलामी गरेर हाम्रो प्रगति हुने देखिन । यो भन्दा त आफ्नै ठाउँमा काम गरे त्यहाँको भन्दा कम मेहतनमै बढी कमाउन सकिने लाग्यो । त्यसपछि यतै फर्किएर काम थालेको हुँ ।’ अहिले आफ्नो काम र कमाईबाट आफू सन्तुष्ट भएर परिवारसंगै दैनिकी विताउन पाएको उनको भनाई छ ।
पाँच पहिना अघिदेखि यो पेशा सुरु गरेका उनले अहिले दैनिक ३० लिटर दूध बिक्रीका लागि बुर्तिबाङमा रहेको डेरीमा ल्याउने गरेका छन् । सुरुमा ५ लाख रुपैयाँबाट व्यवसाय सुरु गरेका उनले छोटो समयमै राम्रो प्रगति गरेका हुन् । अहिलेसम्म व्यवसायमा गरेको लगानी उठिसकेको उनको भनाई छ । ‘पाँच छ महिनामै सुरुको लगानी उठ्ने अवस्था देखिएको छ, उनले नयाँविश्वसँग भने, ‘अहिलेसम्मको कमाईबाट म उत्साहित छु, आम्दानी बढाउन लगानी थपेर व्यवसाय विस्तार गर्ने सोचमा छु ।’
पाण्डेले थालेको पेशालाई उनकी आमा, श्रीमती र दुई छोरीले समेत साथ दिएका छन् । परिवारबाट पनि राम्रो साथ र प्रेरणा पाएकाले व्यवसाय अघि बढाउन आफुमा थप उत्साह मिलेको उनले बताए । परिवारका सदस्यले मात्र काम गर्दा नभ्याईएपछि उनले गाई बस्तुको स्याहारका लागि मासिक रुपमा तलव दिएर एक जना कामदार समेत राखेका छन् ।
उनले देशमै केहि गर्न खोज्ने युवाहरुलाई सरकारले सहयोग गर्ने पर्ने बताए । ‘कृषकका समस्या समाधान गर्न सरकारले उचित कार्यक्रम ल्याउन सके युवा विदेशिनु पर्ने बाध्यता हटेर जान्थ्यो,’ उनले भने ।
बुर्तिबाङ क्षेत्रमा पछिल्लो समय दूध उत्पादन गर्ने किसानको सक्रियता बढ्दै गएको देखिन्छ । ढोरपाटन नगरपालिकाको वडा नं.२ को रिनाम, सेरा, कुत्थाप्ला, सलामकोट, खल्बाङ, वडा नं ३ को पुर्काट, ४ को खुंगा छोरेगाँउ, ५ को नाथुरी लगायतका ठाउँबाट दैनिक बुर्तिबाङमा दूध आउने गरेको छ । बजारमा रहेका दूधडेरीले किसानले ल्याएको दुध खरिद गर्ने गरेका छन् । बुर्तिबाङ ३ वटा दूध डेरी छन् । कतिपय कृषकले भने उपभोक्ताको घरघरमै दूध लगेर बिक्री गर्ने गरेका छन् ।
पछिल्लो समय आसपासमा उत्पादन हुने दूध बुर्तिबा बजारमा मात्र खपत हुन नसकेको भन्दै स्थानीय सरकारले दूध बाहिर पठाउने व्यवस्था मिलाउनुपर्ने बताउन थालेका छन् । उनीहरुले दूध भण्डार केन्द्र पनि आवश्यक रहेको बताएका छन् ।
