भविलाल घर्ती अब कहिल्यै घर फर्कने छैनन्, न फर्कँने छन् ताराबहादुर विक । यही हप्ता भौतिकरूपमा दुवै अस्ताए । भविलाल जापानमा र ताराबहादुर कुवेतमा ।
ताराबहादुरको शुक्रबार राति र भविलालको शनिबार राति दुःखद् निधन भयो । एक दिनको अन्तरमा बागलुङले दुई युवालाई विदेशमा गुमायो । यतिबेला गलकोट नगरपालिका–११ रिघा र वडा नं २ दुदिलाभाटीमा रहेका परिवार तथा आफन्तजन शोकमा छन् ।
घर्तीको घर रिघागाउँमा पर्छ भने विकको दुदिलाभाटी गौँदीमा । चालीस वर्षीय घर्ती भारतीय सेनाको जागिरबाट निवृत्त भएपछि तीन वर्षअघि जापान पुगेका थिए। शनिबार राति रेष्टुराँको कामबाट फर्कने क्रममा अचानक रेलभित्रै लड्ेका घर्तीको हृदयाघातका कारण निधन भएको खबर आयो ।
साइतामा शहरको एक भारतीय रेष्टुराँमा कार्यरत घर्तीलाई अस्पताल पुर्याउँदा चिकित्सकले बाटैमा निधन भएको घोषणा गरेका थिए । ‘उनले कामबाट फर्कने क्रममा रेलमा उभिएरै यात्रा गरिरहेका थिए,’ गलकोट समाज जापानका संरक्षक सल्लाहकार बेलु थापाले भने, ‘असजिलो भएपछि उनी एक्कासि लड्को भन्ने थाहा भयो । ’
अचेत अवस्थामा पुगेका घर्तीलाई रेल कम्पनीकै मानिसले तुरुन्त अस्पताल पुर्याएका थिए । घर्तीको अन्तिम संस्कार यही जुलाई १२ तारिख जापानमै गरिने भएको छ ।
अन्तिम संस्कारका लागि आवश्यक प्रबन्ध र खर्चको जोहो गलकोट समाज जापानले गर्ने भएको छ । कानूनी प्रक्रिया पुर्याउँदा दाहसंस्कार ढिलो हुने भएको हो ।
समाजले मृत्युको घटनामा परिवारको आर्थिक अवस्था हेरेर राहतसमेत उपलब्ध गराउने गरेको छ । मृतक घर्तीकी श्रीमती मनमाया जापानमै छिन् । आफू गएको छ महिनापछि भविलालले श्रीमतीलाई जापान लगेका थिए ।
उनका १६ वर्षीय छोरा सविन र १४ वर्षीय सन्देश अहिले भैरहवामा बसेर पढ्छन् । घरमा आमा, भाइ र बहिनी बस्छन् ।
‘दाइ कहिल्यै बिरामी भएको थाहा थिएन, एक्कासि हृदयाघात भएर मृत्यु भएको खबर आयो’, बहिनी कुमारीले भनिन्। वडाध्यक्ष डम्मर श्रीषका अनुसार घर्ती परिवारको स्थायी बसोवास रिघा र अस्थायी बसोवास भैरहवामा छ ।
यता, ताराबहादुर विकको निधनले दुदिलाभाटी गौँदीमा रहेका परिवार र आफन्तजनमा शोक छाएको छ । एघार वर्षअघि रोजगारीको सिलसिलामा कुवेत पुगेका विकको पनि हृदयाघातका कारण निधन भएको हो ।
विक उच्च रक्तचापका कारण एक महिनादेखि कुवेतको स्थानीय अस्पतालमा उपचाररत थिए । रक्तचापका कारण उनको टाउकोमा गम्भीर असर पुर्याएको चिकित्सकले बताएका थिए ।
विक कुवेतको आम्घारास्थित ‘नुर ग्लास उद्योग’मा कार्यरत थिए । घटनाबारे कुवेतस्थित नेपाली दूतावासलाई जानकारी गराइएको र शव नेपाल ल्याउने प्रक्रिया शुरु भएको जनाइएको छ ।
कुवेतमै रहेका गलकोट नगरपालिका–७ मल्मका दल थापाका अनुसार विकलाई कम्पनीबाट राहत दिलाउने प्रयास भइरहेको छ ।
विकका नेपालमा वृद्ध बाबुआमा, श्रीमती र दुई जुम्ल्याहा छोरा छन् । कमाउन विदेश गएको छोराको उतै निधन भएपछि उमरेले ७० नाघेका बुबाआमा सहाराविहीन बनेका छन् । श्रीमती भुमा र दुई छोराको बिचल्ली भएको छ । विपन्नताका कारण विक परिवारलाई जीविका चलाउनै धौधौ छ ।
‘श्रीमती सामान्य खेतीकिसानी गर्छिन, बुबाआमा वृद्ध भइसके’, गौँदीका स्थानीयवासी धना खत्रीले भने, ‘कमाउने, घर धान्ने मान्छे नै गुमेपछि परिवारमा झन् ठूलो समस्या आइलाग्ने भयो ।’ विकका जुम्ल्याहा छोरा गाउँकै विद्यालयमा पढ्छन् ।
पछिल्लो समय हृदयाघातका कारण अल्पायुमै निधन हुने क्रम बढ्दै गएको गलकोट समाज जापानका संस्थापकसमेत रहेका थापाको भनाइ छ ।
उनका अनुसार पछिल्लो समय जापानमा नेपालीहरुको आत्महत्या दर पनि बढ्दो छ । अस्वस्थकर खानपान, कामको चाप, आरामको कमी, तनाव आदि कारणले हृदयाघातलगायतका स्वास्थ्य समस्या निम्तिएको हुनसक्ने थापाको बुझाइ छ । जापानी कम्पनीमा छ÷छ महीनामा श्रमिकको स्वास्थ्य परीक्षण हुने गरे पनि होटल, रेष्टुराँ क्षेत्रमा त्यो सुविधा छैन ।
आफूलाई के स्वास्थ्य समस्या छ भन्ने थाहै नपाई मानिस आकस्मिक मृत्युको शिकार बनिरहेका छन् ।
विदेशमा कार्यरत नेपाली श्रमिकले नियमित स्वास्थ्य परीक्षणसँगै कामको प्रकृतिअनुसार आवश्यक सजगता अपनाउनुपर्ने देखिन्छ । जापानलगायतका देशमा रहेका नेपालीमा ऋणको बोझ र तनावले पनि स्वास्थ्यमा असर पुर्याइरहेको बताइन्छ ।
सन् २०१५ मा एक हजार नेपाली श्रमिकको विदेशमा मृत्यु भएकामा बागलुङका मात्र २२ युवा थिए । अधिकांश नेपालीको मृत्यु हृदयाघात र विभिन्न स्वास्थ्य समस्याका कारण हुने गरेको पाइएको छ । कार्यक्षेत्र र सडक दुर्घटनाका कारण मृत्यु हुनेको सङ्ख्या भने कम देखिन्छ ।
सरकारी आँकडाअनुसार मलेशियामा सबैभन्दा धेरै नेपाली श्रमिकको मृत्यु हुने गरेको छ । पछिल्लो समय वैदेशिक रोजगार बोर्डले श्रम स्वीकृतिपूर्व दिइने तालीममा स्वास्थ्यसम्बन्धी विषय पाठ्यक्रममा समावेश गर्न थालेको छ ।
