बागलुङ समाज कल्याण केन्द्र महिला समूहकी कोषाध्यक्ष तथा इनर ह्विल क्लब अफ बालाजुकी कार्यसमिति सदस्य मन्दिरा श्रेष्ठले म्याग्दीका बाढीपहिरो पीडित परिवारलाई राहत उपलब्ध गराएकी छिन् । काठमाडौं, वटुनिवासी उनी हेलिकोप्टरमा बाढीपीडित बस्तीमा पुगी खाद्यान्न, लत्ताकपडा, औषधि र नगद उपलब्ध सहयोग गराएकी हुन् ।
‘मैले आफ्नो जिल्लामा बाढीपहिरोले धेरै धनजनको नोक्सानी भएको थाहापछि सामाजिक उत्तरदायित्व महसुस गरी उक्त सहयोग उपलब्ध गराएको हुँ,’ श्रेष्ठले भनिन् । उनी धौलागिरि गाउँपालिका–७ मराङ, धारापानी र मालिका गाउँपालिका–७ को बिम,कुइने मंगला गाउँमा पुगेकी हुन् । उनले २ सय ५० परिवारलाई राहत बाँडेका हुन् ।
‘मैले मेरा श्रीमान् मथुरा श्रेष्ठ र छोरा अनमोलसँग सल्लाह गरेर यस्तो आपतका बेला श्रीमानको जन्म जिल्लामा सानो सहयोग उपलब्ध गराएकी हुँ,’ उनले भनिन् । श्रेष्ठ परिवारले मानव आश्रम,विद्यालय,सामुदायिक भवन,खानेपानी, धार्मिक क्षेत्रमा र देशमा दैवी प्रकोप पर्दा सहयोग गर्दै आएको छ ।
‘बाढी पहिरोले ठुलो धन जनको क्षेति भएर हामीलाई संकटको बेला काठमाडौदेखि र बेनी बजारबाट सहयोगी हातहरु आएर राहत उपलब्ध गराउँदा हामीलाई सहयोग भएको छ,’ मालिका गाउँपालिकाको अध्यक्ष श्रीप्रसाद रोकाले बताए ।बिमा गाउँमा पहिरोले ९ जनाको मृत्यु भएको छ भने ८५ घर परिवार पहिरोका जोखिममा छन ।
गत असार २५ गते राति र २६ गते बिहान आएको बाढीपहिरोका कारण म्याग्दीमा २८ जनाको मृत्यु हुनुका साथै ४ जना बेपत्ता छन् । ३९५ परिवार प्रभावित भएका छन् ।
श्रेष्ठ परिवारसँगै म्याग्दीका समाजसेवी अनोद श्रेष्ठ, केबी भण्डारी, ओम छन्त्याल र हिरा पुनले पनि बाढीपीडित परिवारलाई भाँडाकुँडा र लत्ताकपडा वितरण गरेका छन् । उनीहरूले २ सय ५० परिवारलाई राहत बाँडेका हुन् ।
