जापानको दक्षिण पश्चिम क्षेत्रमा अवस्थित ईसिखावा राज्यको खानाजावा शहर स्थित एक रेष्टुरेन्टमा कार्यरत एक नेपाली युवाको मंगलबार राती कारको ठक्करबाट मृत्यु भएको छ । मंगलबार राती १०स्१५ बजेतिर रेष्टुरेन्टको काम सकेर घर फर्कने क्रममा पछाडीबाट तिव्रगतिमा आएको कारको ठक्करबाट बाग्लुङ नगरपालिका ६ का कृष्ण सापकोटाको घटनास्थलमै मृत्यु भएको हो ।
चिसोका कारण सडकमा जमेको वरफमा पछाडीबाट तिव्रगतिको निजीकार नियन्त्रण भन्दा बाहिर गएपछि पैदल हिडिरहेका सापकोटालाई ठक्कर दिएको थियो । दुई वर्ष अघि कुक भिषामा जापान आएका २५ वर्षिय सापकोटा सडकमा एक्लै पैदल हिडीरहेका थिए ।
घटना लगत्तै उनलाई नजिकैको अस्पताल लगिएको थियो । तर चिकित्सकले उनिलाई मृत्यु भईसकेको जनाएको थियो । घटनाबारे प्रहरीले परिवारलाई जानकारी दिएको थियो ।
दूर्घटना बारेमा थप जानकारी लिन बुधबार बिहान गैरआवासीय नेपाली संघ एनआरएनए जापान तोकाईहोकिरिकु क्षेत्रका टोलीले विस्तृत जानकारी लिएको थियो । मृतकका आफन्तका अनुसार मृत शरिरलाई बिहीबार जापानमानै अन्तिम दाहसंस्कार गरिने तयारी गरिएको छ ।
