युरोपेली मुलुक अष्ट्रियाका मतदाताले आज आमनिर्वाचन अन्तर्गत मतदान गर्दैछन्।मत सर्वेक्षणहरुले कन्जरभेटिभ पिपल्स पार्टीका नेता एवं वर्तमान विदेशमन्त्री जेबास्टियन कुर्ट्सलाई अग्रस्थानमा देखाएका छन् भने चरम दक्षिणपन्थी फ्रीडम पार्टी र सोसल डेमोक्रेट्सबीच दोस्रो स्थानका लागि प्रतिस्पर्धा हुने देखिन्छ।
भावी गठबन्धन सरकारमा चरम दक्षिणपन्थी दल सरकारमा सामेल हुने उत्कृष्ठ अवसर भएको बताइएको छ। बीबीसीका एकजना संवाददाताका अनुसार मत सर्वेक्षणहरु सही साबित भए अष्ट्रियामा ठूलो राजनीतिक परिवर्तन देखिनेछ।
समर्थन
एक दशकभन्दा लामो समयदेखि त्यहाँ सोसल डेमोक्रेट्सले पिपल्स पार्टीसँगको गठबन्धनको नेतृत्व गर्दै आएको छ। तर अब मतदाताहरुको झुकाव दक्षिणपन्थीहरुतर्फ सरेको देखिन्छ।
कीर्तिमान
दोस्रो स्थानका लागि सोसल डेमोक्रेट्ससँग प्रतिस्पर्धा गर्ने चरम दक्षिणपन्थी फ्रीडम पार्टीले कन्जरभेटिभहरुसँग गठबन्धन गर्नसक्छ। गत वर्षको राष्ट्रपतीय चुनावमा फ्रीडम पार्टीका उम्मेदवार झिनो मत अन्तरले पराजित भएका थिए।
गत मे महिनामा पिपल्स पार्टीका नेता चयन भएका कुर्ट्सले शरणार्थीहरु युरोप पुग्ने बाटोहरु बन्द गर्ने र शरणार्थीलाई दिइने सुविधाहरुमा कटौती गर्ने बताउँदै आएका छन्। मत सर्वेक्षणहरुले देखाएअनुसार आमचुनावमा कुर्ट्सको पार्टी विजयी भए उनी विश्वकै कान्छो सरकार प्रमुख हुनेछन्।
साभार:BBC नेपाली सेवा