कोरोना संक्रमण भएका सप्तरीको हनुमाननगर कंकालिनी नगरपालिकाका मेयर शैलेशकुमार साहको स्वास्थ्यमा समस्या देखिएपछि थप उपचारका लागि बुधबार काठमाडौं रिफर गरिएको छ । प्रदेश २ का सामाजिक विकासमन्त्री नवलकिशोर साहका छोरा उनलाई मंगलबार कोरोना पुष्टि भएको थियो ।
प्रादेशिक जनस्वास्थ्य प्रयोगशालामा गरिएको परीक्षणमा कोरोना पोजिटिभ आएपछि उनलाई जनकपुरधामस्थित कोभिड अस्पताल भर्ना गरिएको थियो ।
मेयर साहमा श्वासप्रश्वासको समस्या बढ्दै गएपछि काठमाडौं रिफर गरिएको कोभिड अस्पतालका फोकल पर्सन डा रामदेव चौधरीले जानकारी दिए ।
उनका अनुसार साहलाई निमोनियाको समस्यासमेत देखिएको छ । कोभिड अस्पतालमा भेन्टिलेटरको अभाव रहेकाले उनलाई काठमाडौंस्थित ह्याम्स अस्पतालमा रिफर गरिएको चौधरीले बताए ।
‘नगरप्रमुख साहको अवस्था अहिले सामान्य नै छ तर भेन्टिलेटरको आवश्यकता पर्ने भएकाले काठमाडौं रिफर गरेका हौं,’ उनले भने, ‘काठमाडौं लैजान भेन्टिलेटरसहितको एम्बुलेन्स छ ।’ साहसँगै उनका चालकमा समेत कोरोना पुष्टि भएको बताइएको छ ।
